究竟最多人發嘅夢係乜嘢？除咗發達夢外，相信就要數春夢。雖然根據心理研究指，不論乜嘢年齡嘅人都會發春夢，尤其係青春期嘅男女機會更多。
但英國卻有研究指，唔同學歷嘅男女，發春夢嘅次數亦有分別，學歷愈高次數愈多之餘，內容亦愈見豐富。
根據刊登喺英國《性學期刊》嘅一項研究指出，縱使做春夢係正常嘅現象，但根據佢哋嘅調查所得，做春夢嘅次數同內容，係同智商及學歷程度有關。調查指擁有大學文化程度嘅，佢哋比只得中學文化嘅人多5倍做春夢嘅次數，而內容亦嚟得更加多，好似男士經常會夢到同陌生人曳曳，而女士則經常出現同熟悉嘅人擁抱、接吻同親熱。據研究人員解釋，之所以有咁嘅結果係同人嘅想像力有關，智商同學歷愈高嘅人想像力愈豐富，而佢哋所做嘅春夢亦會變得更多姿多采。研究亦發現，20歲嘅男士及40歲嘅女士最經常做春夢，次數會比其他年齡為高。研究更為受訪者常見嘅3個春夢進行分析，研究春夢內容同心理之間嘅關係，讓大家參考。
喺受訪者中，發現唔少人都會同上司或同事曳曳，而當中更有不少人表示，其實對呢位上司或同事冇愛情嘅感覺。既然係咁點解會夢到同佢曳曳呢？專家解釋曳曳並非因為鍾意佢，好多只係欽佩對方嘅能力同性格，並希望佢喺工作上對你有所啟發。
唔知大家有冇做過喺公眾場所曳曳嘅春夢呢？據研究指，原來有唔少受訪者都曾經做過呢種春夢。專家解釋呢種係想開始新經歷嘅一種暗示。可能代表你想有新嘅開始，或者想擁有一段新嘅戀情，甚至係想有新嘅出路。
同性之間嘅親密行為，相信唔係個個人都接受得到，只係原來每人都有機會發到同同性有親密接觸嘅春夢。專家認為咁並非意味你嘅性取向有所改變，只係說明你期望喺性生活上，得到對方更多嘅關心同體貼而已。
撰文：魂