模特兒要紅透半邊天，首要條件就係要「吃得開」，我所講嘅唔係囡囡要陪多啲老闆食飯，而係任何產品代言，佢哋都可以照單全收，完全駕馭，咁就係吃得開，好似今日要介紹嘅倪慕斯，就係「吃得開」嘅表表者！
喺北京土生土長嘅倪慕斯，細細個就好喜歡表現自己，高中畢業後就考入北京電影學院嘅表演系，大家咪以為呢間學院好易入，其實每年只招幾十人，而報名人數往往過萬以上，考到嘅都係百中挑一嘅靚仔靚女，而倪慕斯就係其中一個。佢讀書期間更被網友封為「北影」校花，成為一眾小美人之首，呢個頭銜真係唔簡單。慕斯畢業後全職投入模特兒工作，短短幾年，就接咗將近過百個走騷或者代言嘅工作，當中包括汽車、時裝、飲品、金融、電子產品等。除咗啲前輩級「阿姐」之外，佢都算係新人中最吃得開嘅一個。
分析佢嘅成功之道，本身條件絕對毋庸置疑，事關倪慕斯身高175cm，但體重100磅唔夠，高挑纖瘦嘅衣架身材，唔做模特兒簡直浪費。三圍方面，上圍34吋，中圍24吋，下圍35吋，總算玲瓏浮凸，有前有後，特別拍一啲性感照時，佢嘅「鬼影變幻球」就會變得又圓又挺，出嚟嘅效果一流，令人鼻血長流，而且倪慕斯一係唔拍，一拍就會完全豁出去，任由攝影師擺布，所以作品深受網友歡迎。慕斯雖然當紅，但為人低調，走騷時唔會刻意賣肉，放工後就好深閨，咁知自愛又有本錢嘅囡囡，相信佢嘅前途一定無可限量。
出生地：北京
三圍：34-24-35
身高：175cm
撰文：龍四海