火山嘅景色何其壯麗，因此成為旅遊勝地，而火山所釋放出嚟嘅熱力，可以用嚟發電；溫泉水則可以用嚟治療皮膚病同風濕骨痛，卻估唔到火山散發出嚟嘅臭氣，更具有壯陽功效。意大利就有對兄弟睇中咗呢點，喺火山旁開咗個專為情侶玩得盡興嘅性愛停車場，等佢哋可以盡情車震！
去過火山旅遊嘅人都體驗過，火山附近會聞到一陣濃烈到好似臭雞蛋嘅氣味，學名叫做硫化氫，聞得多更有機會中毒，故此有「惡魔的臭屁」之稱。不過估唔到呢種氣體，對性功能勃起障礙具有治療作用。專家解釋小量硫化氫可促進血液循環及放鬆神經，因而對不舉有一定嘅治療作用，可以話係天然壯陽藥。意大利就有對兄弟Riccardo Casaletta及Daniele Casaletta睇中咗硫化氫嘅妙用，喺南部那不勒斯嘅索爾法塔拉火山旁，開設咗一個專為不舉男士而設嘅車震停車場。據Daniele解釋，開設露天車震停車場嘅原因，係因為每對情侶都會揸車上嚟，既然火山空氣中嘅元素有此妙用，點解唔畀個地方等佢哋可以盡情玩樂呢？
為咗保障車震男女嘅私隱，停車場用木板隔開各個車位，當汽車駛入泊位後，只要將藍色布簾放落嚟，車位即會變身成私人空間，讓情侶可以喺裏面盡情交戰。完事後，只要將汽車駛出即可落山，果真相當方便！為咗等入場人士有賓至如歸嘅享受，停車場門口更有專人送上禮品包，禮品包內包括避孕套、有關性愛的知識、車震手冊等，甚至還有避免愛滋病的宣傳單張，最重要當然係有提醒男女小心吸入過量的硫化氫嘅警告標籤。停車場嘅收費亦相當吸引，頭兩粒鐘收費為5歐元（約50港元），之後每半粒鐘收1.5歐元（約15港元）。雖然火山玩車震又可改善不舉問題，但有網民表示要聞住臭雞蛋嘅氣味曳曳，感覺反胃多過會興奮，唔知大家又點睇呢？
撰文：魂