如果論知名度同接受程度，形象性感而健康嘅日本水着妹，點計都比AV女優為佳，但係家陣喺內地最紅嘅日本妹，卻係AV女優出身嘅蒼井空。到底係水着妹唔爭氣，定係佢哋鮮有進軍內地呢？未來情況相信會有所改變，因為擁有I-Cup重量級導彈嘅護亞沙奈，正計劃向內地進軍！
家陣日本水着界最當紅，連普遍香港男士都認識嘅爆乳女優，一定係杉原杏璃，無他嘅，杏璃呢種大眼甜姐兒人靚又白滑，胸前對極品G奶更加令人睇到眼甘甘，最重要係香港唔少夜場嘅宣傳海報都係用阿妹佢嘅肖像嘛。不過，水着界嘅爆乳尤物又點止佢一個咁正呢！如果想要點冷酷感覺的話，仲有護亞沙奈。今年23歲嘅亞沙奈原名叫河野麻奈，個樣冷酷非常之外，唔知大家覺唔覺得佢嘅氣質帶點東南亞感覺呢？冇錯，佢阿爸係柬埔寨人，移居日本之後就同日籍媽媽生咗佢。雖然佢父母都係亞洲人，但係亞沙奈嘅一副勁爆身材就似歐洲美女。身高5呎8吋嘅佢屬於日本少見嘅長身系美人，仲擁有一對36I超級巨乳，但係條腰只得23吋咁幼。天呀！點解佢副偈可以咁正o架！
由於亞沙奈正到咁淒涼，對I奶又勁得咁交關，所以出道初期被稱為「寫真歷史上最強的巨乳」。雖然係咁，亞沙奈嘅性格可能同佢個樣一樣內斂又唔多鍾意笑，所以綜藝節目對佢亦唔多感興趣，少有邀請佢參演。不過，阿妹都唔怕冇工作，因為佢身材夠晒高大，演舞台劇一流，演出嘅劇目包括《方舟》、《高中歌劇男子組》等等。另外，佢亦係電影常客，上年演出過《殭屍Ash》以及《東京沒有記號女孩故事》，今年亦有《怪物》以及《男女大戰》。漸漸向演藝界發展嘅亞沙奈早前仲話有意進軍內地，並且透露有內地網絡遊戲搵佢做代言人。消息透露之後，好多日本網友都大表支持，仲話亞沙奈真係到內地發展，憑其勁爆身材一定會成為蒼井空嘅勁敵添。
近年活躍於舞台演出嘅護亞沙奈，不時會喺博客透露演出嘅情況，想知阿妹最近又扮演咩角色，角色嘅造型又性唔性感，可以Click上去睇睇。
網址：http://ameblo.jp/mamoruasana/
年齡：23歲
身高：5呎8吋
三圍：36I-23-35
撰文：賢