國際性體育盛事浪接浪，巴西喺2014年舉辦世界盃，喺2016年就要舉辦奧運，所以政府大力呼籲民眾學英語，而其中最積極響應嘅，包括一眾性工作者。
仲有一年多，新一屆嘅世界盃就要喺巴西多個城市舉行，當地政府除咗喺硬件上不斷趕工，起場館、修公路、建酒店外，近日更開始軟件配合，由於巴西係葡語系國家，為咗好好接待嚟自世界各地嘅球迷，當局動員全民學英語，特別係幾個最前線，最易接觸外地球迷嘅行業，例如酒店、飲食、的士司機等，佢哋各自由自己嘅工會開班，希望把好前線呢一關。此外，近日亦有一個相關工會開班，而且反應異常熱烈，聘用20個老師都話唔夠。邊個咁好學呀？原來係巴西性工作者協會舉辦嘅免費英語班，據協會會長講，佢哋現時急需大量義工當英語老師！
巴西做妓女係合法嘅，佢哋有自己嘅組織，眼見全國總動員學英語，佢哋亦為姊妹們免費開班，據講打算喺全國12個城市開辦300個學習小組，希望可以滿足到四千人嘅需要，所以急需大量義工。而巴西嘅性工作者，大部分都唔係當地人，而係嚟自附近中南美國家嘅女性，佢哋好多只會土語，甚至連葡語都唔係咁識。至於課程內容，最重要就係教曉佢哋講解服務內容，同埋討價還價，希望呢批站在最前線嘅囡囡，喺盛會期間做好本分同埋取得應有嘅尊嚴。