最近美國有樁極為轟動嘅新聞，就係克利夫蘭有三名失蹤十年嘅女仔突然現身，原來佢哋一直都畀人禁錮於地下室，期間更慘遭非人道對待。幸好，行兇之徒已經落網，而三名受害人及其骨肉亦重獲自由，得與家人團聚。其實呢種禁室培慾嘅情節，電影亦有唔少，日本嘅呢一系列更拍到第八集，而第一集梗係最好睇最具話題性啦！
《禁室培慾》第一集故事，講述一名48歲嘅中年麻甩佬岩園貞義（竹中直人飾演），某日將18歲嘅高中生樺島邦子（小島聖飾演）綁架，目的係為同對方培養感情，然後進行一次心靈與肉體得以完美結合嘅交歡。邦子開頭都覺得好驚，但係貞義卻又對佢彬彬有禮，仲對佢講：「對唔住，我綁架咗你。」令邦子總算減低擔心。不過，為令邦子唔好走佬，貞義出動到手銬，有時仲會用刀威嚇。二人日夕相對，邦子漸漸被貞義嘅和善對待減卻恨意，更開始鍾意對方。後，二人更加一齊參加溫泉旅行，中途終於發生關係。到邦子被綁架68日之後，警察成功搵到上門救出邦子，貞義被控誘拐未成年少女罪，面臨死刑或終身監禁。不過，邦子就向警察表示，呢次唔係綁架，而係一次快樂嘅同居生活。
綁架少女返屋企培養感情當然屬於戀態，但係事實上又真係有呢種同情罪犯而生起愛情嘅斯德哥爾摩症候群存在，而將此病症展現嘅日本電影，相信本作係第一部，所以一度成為社會話題。另一方面，飾演邦子嘅小島聖當年係青春玉女，更有隱藏巨乳之稱，本作當中來個大解放全裸演出，已經令人興奮，而佢嘅對手又係外表猥褻嘅竹中直人，兩者相處嘅時候更顯得格外刺激，而一般平凡嘅廣大男子更加容易將自己投射到其貌不揚嘅竹中直人身上，睇戲嘅時候更有代入感。