雖然話有一張「沙紙」在手，起步線好似會比其他人好啲，但有人則認為只要肯努力向前，縱然冇大學學位喺手，同樣有機會出人頭地。家陣英國炙手可熱嘅裸模Vikki Blows，相當認同呢個講法，事關佢自己就係憑住毅力，即使早早輟學卻仍然有一番成就。
今年28歲嘅英國人氣裸模Vikki Blows，從出道至今幾乎登上過各大男士雜誌嘅封面。呢位身材出眾嘅裸模，除咗一對純天然嘅竹筍波令人留下深刻印象外，佢右邊唇上嘅鑲珠，酷似銷魂癦更係佢嘅個人標誌。講到Vikki嘅經歷，其實都相當傳奇，事關佢早喺13歲時已經被踢出校。雖然至今仍然冇解釋點解被踢出校，但性格倔強嘅佢卻決定輟學，轉而去髮型屋做學徒。Vikki表示當年年少氣盛，一啲都唔覺得冇書讀係大問題，反而覺得早早喺社會上打滾，更令佢學到必要嘅嘢。及至15歲時，Vikki覺得自己性格唔適合髮型屋工作，反而萌生成為模特兒嘅想法，事關佢當時相當仰慕著名模特兒Kate Moss，希望好似佢咁成為雜誌嘅封面女郎，於是自薦一輯寫真到模特兒公司，而呢個決定則成為Vikki人生嘅轉捩點。
當時模特兒公司收到Vikki嘅寫真時，表示佢因為身材太矮唔適合模特兒工作，過咗幾年後，卻突然被英國太陽報邀請，參加第3頁女郎面試會。Vikki指佢喺面試前幾日感到相當緊張，當日更特意打扮成兔女郎上陣。點知去到試場後，卻發現自己表現相當僵硬，呢個時候Vikki突然做出出位嘅舉動，就係剝剩條底褲！佢解釋覺得唔着衫反而更自然，並更能表現出自己果敢嘅性格，正正係呢種舉動馬上得到評審人員嘅賞識，從此展開其裸模生涯。由於Vikki早就喺社會工作關係，故此佢比同齡人早熟，亦明白到想出人頭地嘅話，一定要努力向前，因此雖然甫出道便成名，但佢仍然努力不懈，涉獵其他嘅工作。除咗參與天橋騷、廣播劇同MV演出工作外，最近更走去學做DJ，並經常到世界各地嘅酒吧及的士高演出，果真係名利雙收！睇完Vikki嘅經歷，邊個話努力唔會有出頭天呢？
如果要數最識得利用網絡資源嘅裸模，Vikki一定榜上有名。事關佢唔單止有官方網站、官方微博，佢更頻頻現身私人Twitter，同一班跟隨者分享近況。如果想知道呢位炙手可熱脫星嘅最新動向，大家就要入去睇吓喇！
網址：twitter.com/blowsofficial