模特兒當中好少人會走低調路線，事關呢個圈子會以你嘅曝光率嚟定受歡迎程度，曝光愈多，話題愈多，你就工作愈多，囡囡寂寂無聞，就會無人問津，但嚟自北京嘅王丸丸卻啱啱相反，愈低調反而愈受歡迎。
2009年出道嘅王丸丸，唔係藝術學校學生，亦冇參加過大型選美比賽，可以話白紙一張，誤打誤撞就畀佢做咗模特兒。話說佢最先加入一個模特兒網站，自己貼啲圖片上去，等有緣人發掘，點知冇幾耐，就有第一個電話打嚟，之後電話不斷，由個人龍友、雜誌編輯，後嚟更有廣告公司企劃，而丸丸亦由拍人像寫真，到雜誌封面，直至做廣告代言，就係咁樣一級級捱上去，成為北京炙手可熱嘅人氣名模。佢拍嘅廣告真係唔少，全部係一級品牌，但最奇怪嘅一件事，就係冇打鑼打鼓做宣傳，所以唔少朋友都唔知丸丸嘅收費已屬頂級。
丸丸一向低調，好少出席公開活動，就算出席，都係最低調嘅一個，唔會瘋胸炸乳，只要同場有艷星或巨星出現，佢就唔會畀人發現到。丸丸除咗在工作上低調，連私生活亦一樣，多年來網上都搵唔到佢嘅新聞或者緋聞，就連好多模特兒趨之若鶩嘅電視台綜藝節目，都好少見到丸丸嘅蹤影，絕對係不食人間煙火嘅美女，有人就懷疑佢嘅身份，會唔會係名人嘅小三或者係富二代？丸丸嘅粉絲立即反駁，話佢工作不斷，又點會係小三或富二代呢？咁又啱！丸丸真係默默工作，只要留意佢嘅官網就會發現到，咁敬業樂業嘅靚女真係難能可貴。丸丸，我哋支持你呀！
簡介：呢個網頁收錄晒王丸丸出道四年來嘅精彩圖片，見證住大美人嘅誕生，當中不乏性感寫真，而且每一輯都有驚喜，令人血脈沸騰。
網址：www.moko.cc/wangwanwan
撰文：龍四海