多年前，三色台好鍾意喺夜晚12點過後播啲打打殺殺嘅卡通片，搞到小弟我每個星期六都要捱眼瞓去睇。大家可能會問：喂！嗰啲卡通片一點都未夠就播完，使唔使捱眼瞓呀？因為我要睇埋英文台播嘅成人電影吖嘛！雖然，已將露點鏡頭全部刪除，但係當中嘅情節極盡挑逗，令當時嘅我相當着迷，尤以《偷月迷情》呢部經典情色片最令我印象深刻。
《偷》片故事講述，奈傑（曉格蘭特飾演）同老婆費安娜結婚七周年，感情要好，恩愛非常，為咗慶祝結婚周年於是參加郵輪旅行，期間佢哋認識咗奧斯卡同咪咪兩公婆。奧斯卡下身殘障要坐輪椅，而咪咪則係一個美艷動人，足以迷倒眾生嘅火辣尤物。奈傑被咪咪嘅魅力迷住，奧斯卡知道之後就提出條件，如果奈傑聆聽佢哋嘅愛情故事的話，就可以一親咪咪嘅香澤。奈傑之後發現，當中係一段畸戀。
奧斯卡同咪咪邂逅之後，終日沉迷色慾之中，後來奧斯卡討厭咪咪嘅癡戀，對咪咪百般玩弄甚至羞辱。後來，奧斯卡因車禍而斷腳，咪咪為報復而將養傷嘅佢再次摧殘，好等奧斯卡變成殘廢，一世都唔可以離開自己。
其實，奈傑同費安娜嘅感情亦同佢哋差不多，表面雖然恩愛，實際上已經開始討厭對方，又係另一段孽戀。而更驚人嘅係，咪咪迷倒奈傑嘅同時，亦用其魅力令費安娜嘅性傾向有所傾斜。正當雙方嘅關係受到破壞嘅同時，奧斯卡突然舉槍射殺咪咪，之後吞槍自殺，結束一段無可挽回嘅畸戀。從奧斯卡嘅回憶鏡頭之中，可以見到佢同咪咪兩個嘅調情戲極之意淫，同時亦玩起SM，為電影添加重口味元素，而飾演咪咪嘅女星Emmanuelle Seigner真係風采迷人，令幕幕床戲都咁誘人，加上知名導演波蘭斯基嘅精心拍攝，令作品欣賞指數爆燈！
撰文：賢