早前清明節，令人想起一個名詞「火山孝子」，由來有人話出自香港嘅塘西妓寨，但亦有網友指係出自澳門。話說百多年前澳門嘅花國三街，即係今日嘅福隆新街、福榮里同埋福隆新巷，大大小小嘅妓院就超過一百間，佢哋門口例必會供奉五方五土龍神，即係大家常見嘅「地主」，而「地主」嘅神位旁邊，會有一塊紅泥磚，上面放咗一個公仔，全身披麻戴孝，而且手持孝杖，明顯就係一個「孝子像」。據老街坊講，供奉「孝子」就係要啲客人好似孝子咁聽聽話話，晚晚都攞錢嚟孝敬囡囡，所以以「孝子」嚟比喻客人。雖然咁做，但佢哋都好有良心，喺神位兩邊貼上對聯，就係「興家子弟遠去他方，敗家子弟入室登堂」，即係顧家興業嘅子弟就咪入嚟，至於敗家子孫嘅就歡迎光顧，妓院雖然貼咗溫馨提示，但無論創業子弟或敗家子孫，都抵受唔住花街裏鶯鶯燕燕嘅引誘，個個都甘心情願做晒孝子。