近年興起食四川菜，坊間湧現唔少打住四川旗號嘅食店，好似川味麻辣雞煲、四川燒烤、川味酸辣粉等等，卻估唔到連桑拿都可以品嘗到呢啲四川滋味，而色香味更係做得相當地道。講到四川傳統名菜，一定要數川味辣子雞，只係家陣好多所謂川味辣子雞，卻係經過多番改良，傳統辣子雞嘅辛、麻同辣同時呈現嘅滋味好多時都難以同時體驗。呢一碟辣子雞就唔同，事關佢不但做到以上嘅色香味，而四川乾椒同花椒嘅比例調校得啱啱好，最重要係經過泡油嘅走地雞外脆而內嫩，雞味滿瀉而唔會畀辛辣味所掩蓋。據聞辣椒有催情嘅作用，入閘前先作品嘗，確係人生快事。