當愛情路上出現小三時，唔少女士都希望挽留男友，等佢浪子回頭，故此會畀多次機會佢。不過對於裸模Jess Impiazzi嚟講，處理手法卻相當決絕，當知道男友背住佢溝女時，情願斬斷情絲，留喺屋企做宅女，都唔想等花心男友返轉頭。
今年24歲、英國出生嘅索女Jess Impiazzi，喺09年投身裸模界前，曾經做過唔少工作，包括售貨員、銷售女郎、酒吧侍應等，憑住美麗嘅樣貌同埋勻稱嘅身材，Jess不乏裙下之臣，及後佢自薦到男士雜誌拍攝封面寫真，馬上備受青睞，從此加入裸模嘅行列。Jess喺裸模界嘅發展相當順利，先後幫幾本著名嘅成人男士雜誌拍攝封面寫真，其後更進軍澳洲男性雜誌，並以其美腿為時裝雜誌影寫真。此外，Jess更以其青春兼活力十足嘅形象，為汽車、單車、網球等運動雜誌影相，為佢前途開拓出更大嘅前景。除咗裸模工作外，Jess仲兼職埋英國夜總會嘅推廣女郎，憑其名氣作招徠，搵銀絕對有計！
人紅兼有樣及有身材自然多人追，之但係原來Jess早已心有所屬，佢就係英國真人騷節目《The Only Way Is Essex》當中嘅男演員Mario Falcone。Mario靚仔又大隻，絕對係標準萬人迷，而佢早年被拍得同索女Jess拖手行街嘅恩愛相，及後傳出兩人已訂婚時，更有唔少人盛讚佢哋係天造地設嘅一對。點知好景不常，Mario喺節目中嘅女對手兼演員Lucy Mecklenburgh喺去年10月突然搵Jess，原來Lucy收到超過50條由Mario發出嘅調情短訊，為咗以示清白，Lucy決定將短訊事件話畀Jess知。Jess知道後即刻大動肝火，公告要同Mario分手兼解除婚約。有知情人士透露，其實Jess之所以咁決絕並非偶然，原來早喺去年2月已經發現男友曾向40位女性發出調情短訊，其後原諒咗佢並於去年夏季同Mario訂婚，卻估唔到後嚟發生Lucy呢件事。Jess表示已經唔能夠再百分百相信男友，加上佢依家仲年輕唔想咁快結婚，情願放工後留喺屋企，暫時都唔想有感情生活咁話。睇嚟情傷對Jess嚟講真係好傷呀！
情傷咗半年，睇嚟Jess心情已經好番好多，事關佢喺Twitter度透露呢排正打算去旅行，仲同班姊妹輕鬆調笑。如果作為Jess嘅粉絲，想佢早日走出情傷，又或者想聽佢訴心聲嘅話，不妨做佢嘅追隨者啦！
網址：twitter.com/jess_impiazzi
出生日期：1989年9月3日
身高：5呎5吋
三圍：32C、24、33
撰文：魂