成人論壇經常有巴打喺上面分享自己嘅夜遊包膠，通常都係出於自發性，而日本著名成人影音及產品集團Soft of Demand（SOD），最近則斥資一億日圓（約789萬港元），打造出號稱最有系統、最具公信力嘅風俗調查團，一網打盡日本嘅風俗店，等一眾好色之徒能夠掌握該店嘅服務質素。
呢個由重金打造，號稱最強嘅日本風俗調查網站剛喺今個月8日成立，而網站內嘅報告亦相當詳盡，幾乎網羅晒各種類型同玩法嘅風俗店，從人妻、泡姬到SM女王等都有。
為咗能夠成為最有系統同公信力嘅風俗網，SOD早前喺全國誠徵男性玩家，加入佢哋個調查團，仲話全資資助玩家落場調查，即係佢出錢畀玩家去曳曳。唔使畀錢去玩，相信唔少男士都會即刻舉手報名啦！不過想成為調查團嘅團員卻要符合一定嘅要求，首先係要年滿20歲，仲要冇任何刑事紀錄之餘，更要指定住喺某幾個地方嘅男士至可以參加。皆因網站成立初期，只係集中東京都、埼玉縣、神奈川縣同千葉縣呢四個地方嘅風俗店進行調查，此外，但凡同風俗業有關嘅人士都唔可以入團。不過就算符合以上嘅要求都仲未入得團，因為參加人士仲要填寫問卷嚟作為性格檢定先至可以入選，要求確係相當嚴格。
千辛萬苦至可以入團，咪以為咁就可以免費去曳曳喎！事關作為專業嘅調查員，最重要係識得寫包膠同巴打分享至得。為咗系統化包膠嘅資料，每位調查員「實訪」後，都要按一定嘅規格嚟寫包膠，而內容更係要有咁詳細得咁詳細，寫完出嚟後唔單止由佢哋自己嚟評分，巴打亦可以根據自己嘅親身體驗，嚟對團員嘅報告進行評分，以印證包膠嘅可信度。如果評分過低嘅團員，最終會被剔除出團員名單外，審核相當嚴格。問到點解要重金打造呢個風俗調查團時，SOD表示希望能夠改善風俗店嘅服務質素，並且能夠趕絕網上不實嘅包膠，而為咗避免寫手同風俗店有利益關係，因此佢哋便以全資資助嘅方式，從而達到公正、持平嘅目的。