澳門回力球場傳聞好快就會改建，打令浴室打算搬去十六浦附近繼續營業，而樓下嘅艷舞團，就仲未收到風搬去邊？講開呢個艷舞團，喺澳門都有幾十年歷史，而大家又記唔記得首個嚟自法國嘅艷舞團喺邊度演出呢？如果唔係澳門嘅老街坊相信都唔會記得，原來最先係喺崗頂戲院演出，當年都不知幾巴閉，因為佢哋大事宣傳，話全部成員都係法國妹，而且人靚身材好，仲受過專業訓練，報稱大部分成員係嚟自法國有名嘅癲馬夜總會，所以歌精舞勁，而最令人留下深刻印象嘅就係佢哋一字排開大跳「肯肯舞」，個個將長腿踢到半天高，裏面條底褲，完全呈現觀眾眼前，雖然係條又長又厚嘅「牛頭褲」，但當時經已吸引無數男士，遠道前嚟捧場。另一幕囡囡喺水缸扮美人魚做高難度動作，亦令人印象深刻，講真色情成分真係有限，但由於係外國金絲貓演出，所以喺當時已經夠晒震撼，甘心畀成舊水嚟捧場。