由銀幕情侶變成真實情侶嘅例子有唔少，好似已經分手嘅伊健同詠琪就係其中之一。藝人情侶以情侶檔拍戲不足為奇，但係一齊拍情色片就令人嘖嘖稱奇。邊對情侶咁大膽咁豪放？咪就係已各自成家嘅湯告魯斯同妮歌潔曼囉。呢齣1999年上映嘅情色電影《大開眼戒》，亮點除咗係國際級名導演史丹利寇比力克嘅最後之作外，就係當時仲係情侶嘅湯同妮歌呢對金童玉女首次合作拍情色片，妮歌潔曼更加有露點演出，同靚佬湯激情戲一幕接一幕。
《大》片故事講述湯同妮兩個係一對醫生夫婦，靚仔配靚女，事業有成，生活無憂，關係要好，集合晒所有令人羨慕嘅要素。佢哋一次到上流人士舉行嘅派對作客，因酒精影響，兩個返到屋企除咗放縱地享受情慾，妮仲不諱言心底裏對情慾嘅幻想，更試過精神出軌，幻想同其他男人發生關係，二人嘅關係因而即時跌至谷底。後來，湯輾轉經歷唔少挑戰道德操守嘅事情，仲參與過一個神秘面具性愛派對。最後，湯返到屋企，同妮一齊發現自己都係深愛對方，雙方關係得以重修，而呢一刻佢哋最急切、最想做嘅事就係上床。美艷動人嘅妮歌潔曼一直都係好多男人嘅夢中女神，今次激情露點演出，絕對係《大》片嘅最大賣點，而片中嘅性愛派對，一班神秘裸體女郎個個都擁有魔鬼身段，肉體橫陳嘅畫面亦誘惑之極，加上名導史丹利寇比力克嘅頂級拍攝同細膩敍事手法，令電影更具欣賞價值。
撰文：賢