香港最出名嘅沙灘係淺水灣，而澳門嘅著名沙灘，毫無疑問一定係路環嘅黑沙海灘，呢個海灘全部沙都係黑色，因而得名，而香港人叫慣海灘做乜乜灣，所以約定俗成叫咗佢做黑沙灣，但就同澳門市內嘅黑沙環經常搞錯，記得十幾廿年前去黑沙灣，真係山長水遠，唔似家陣咁方便，所以嚟親嘅都係有車人士，由於遊人稀少，特別係閒日，吸引唔少喜歡天體嘅朋友嚟享受日光浴。據當地嘅老街坊講，大約四十多年前，更有外國人組成嘅天體組織定時喺度搞活動，只要佢哋一有活動，附近村子嘅人都會圍喺樹林裏面（目及）嘢，所以黑沙灣曾經係澳門嘅天體聖地，後嚟因為交通方便咗同埋遊人愈嚟愈多，天體活動至自行消失。