以前我仲係o靚仔嗰陣，冇電腦又冇錢，想睇鹹片真係唔容易，許多時趁屋企冇人，鬼鬼祟祟偷老竇啲珍藏嚟睇。老實講，以前嘅西洋鹹片真係幾好睇，有意境、有配樂，最重要就係女主角有韻味，而且身材全屬天然。喺多齣陳年舊作當中，最正梗係《艾曼紐》啦，並非係小弟一人偏見，而係三億人嘅共同意見。法國電影《艾曼紐》系列嘅第一部於1974年上映，將艾曼紐．亞森（Emmanuelle Arsan）嘅小說作品《艾曼紐夫人》（Emmanuelle: The Joys of a Woman）改編拍成電影，及後以此為題材嘅電影作品極多，但係以ASP（Alain Siritzky Productions）影業公司發行嘅電影才是官方。《艾曼紐》第一集故事講述法國外交官嘅夫人艾曼紐因為老公公事繁忙，搞到自己成日要獨守空房，寂寞難耐之下就經常外出，期間認識咗唔少男人，更加同對方發生關係。劇情係有啲老土，但係由於飾演艾曼紐嘅荷蘭女演員施維亞．姬絲桃演出時風華絕代，時而沉鬱，時而放蕩，加上調情場面意淫又不失美感，令電影誘惑又具欣賞價值，施維亞．姬絲桃嘅魅力更加迷倒萬千男士。故此，粗略估計，《艾曼紐》電影吸引超過三億觀眾，喺凱旋門戲院（Arc de Triomphe Theatre）更加連續放映超過11年。唔得喇！趁佢家陣出咗藍光碟，買番隻再三回味先。