內地唔少大學生，讀書時已踏足模特兒行業，仲取得唔錯嘅成績，每當畢業前夕，佢哋就會陷入人生交叉點，究竟應該學以致用，定係繼續喺娛樂圈發展呢？呢個問題同樣纏擾着今日要介紹嘅靚女，嚟自四川嘅劉珍妮。
喺中國人民大學讀緊培訓專業嘅劉珍妮，今年就要畢業，本來一心喺培訓行業發展，但兩年前喺朋友游說下，開始咗模特兒嘅工作，由於珍妮樣子清秀，靈氣逼人，甚有觀眾緣，所以喺事業上可以話一帆風順，而且工作不斷，後嚟更參與網絡遊戲代言工作，因而人氣急升，睇嚟畢業後如無意外，都係會做落去。而唯一擔心嘅，相信就係要點樣游說父母支持，珍妮話自己客串做模特兒，都一直有知會雙親，亦獲得支持。珍妮說：「當正式入行，我會更努力，希望把每一輯相或者每一項工作做好，令父母放心畀我做落去。」
珍妮咁識諗，相信佢父母都唔會點反對。而令佢人氣急升嘅遊戲代言工作，佢都話會繼續接嚟做，但做遊戲代言，衣服方面要十分性感，又接唔接受到呢？珍妮表示自己嘅底線暫時係泳衣照，而一般動漫服飾，點都比較保守，只係個別位置稍為露出而已！珍妮咁講大家可以放心，因為咁好身材，如果太多遮遮掩掩，咁就真係暴殄天物。而據知情人士透露，由於之前珍妮仲讀緊書，所以尺度較收斂，家陣一畢業，一定會比以前更放更大膽，所以粉絲們真係要密切留意，而唔講唔知，珍妮唱歌都好掂，睇嚟仲有機會進軍歌壇添。
簡介：劉珍妮由於仲係學生，所以唔敢太高調，好多照片都未有放上網，所以官網裏面照片較少，但今年畢業後相信就會陸續有嚟，保證精彩。
網址：www.moko.cc/lznlzn
出生地：四川
三 圍：33-26-35
身 高：163cm
撰文：龍四海