想去性愛博物館開眼界，除咗西班牙、荷蘭等地方外，家陣又多咗個好去處，就係位於俄羅斯聖彼得堡嘅「MuzEros」。呢間剛喺2月13日開幕嘅性博館，用咗長達3年嘅時間去籌備，搜羅全球各類型情色物品，從具有歷史價值嘅情趣用品、畫作、雕塑，以至大型情趣家具等。為咗全方位展現各種展品，展館共分為歷史館、主題展館、現代館、文化館同3D多媒體館，當中尤以多媒體館至為有吸引力。事關佢以立體影像播放情色經典電影及床上寶典，配合埋24小時開放，幾時去睇都得。
最近有朋友自誇係美國短脗鱷，問佢點解？佢話科學家指出，美國短脗鱷任何時間都處於勃起狀態，只要一有需要就可以進行交配。起初大家唔知，都覺得呢位朋友好威猛，後嚟有朋友追看呢篇報道，先至發覺原來所謂長時間勃起，只係美國短脗鱷嘅生殖器，由於適應爬蟲類生活，所以平時會藏於體內，有需要時才會露出，但因為生殖器有大量膠質包裹住，所以不能隨意脹大縮小，永遠都係保持一個長度同硬度，但最好笑，就係美國短脗鱷嘅生殖器只有兩吋長，朋友們得知個個都笑到碌地。呢個故事教訓大家，睇新聞真係要睇全套，咪就咁睇標題就算！
日本有間宣傳公司諗到一條世紀好橋，就係搵啲美少女用佢哋嘅肉體嚟賣廣告，話說舊年11月日本天氣轉冷，呢間公司就搵嚟一千三百多位靚女，要佢哋獻出肉體嚟幫手賣廣告，有人會問啲囡囡咁蝕底都制？其實所謂露肉，只係要佢哋露條長腿，喺大髀上面就會印上宣傳字句，千多個囡囡露條玉腿通街行，無論男女老少都會望多兩眼。囡囡除咗通街走之外，如果引得途人圍觀，將佢哋拍低放上網，就會有額外獎勵，不少囡囡都會刻意花枝招展，引得途人停步圍觀。你話遲吓夏天，囡囡心口賣廣告，一定會更吸引。
最近有個調查，訪問咗兩千名英國人，要佢哋列出完美假期需要乜嘢條件。佢哋話度假嘅地方，一定要夠寧靜，唔少得陽光與海灘；但好奇怪，入住嘅酒店又一定要有泳池！咁有人問佢哋去海灘唔游水又做乜？原來佢哋好喜歡曬太陽。據調查指出，佢哋要曬九小時太陽先至夠皮，換轉係香港人，唔變炭就奇。此外，享受完寧靜之後，又要有兩日「濕平」時間；仲有一樣嘢最奇怪，就係一定要攞本鹹書去睇，咁至算度假。其實帶個情人同行，就已經乜都滿足晒，仲睇鹹書嚟做乜？除非一早就預咗個情人有心無力！咁仲同佢去乜鬼旅行喎！
撰文：小德