近年唔少地方都有搞情色博覽會，而規模更係愈搞愈大，只係睇騷當然要揀最正嘅嚟睇。好似一個剛啱結束，名為Eropolis嘅法國情色博覽會，其規模之大不但係全球數一數二，而佢嘅參展情色用品店同參展女郎嘅質素，更係既多姿多采又高質，絕對不容錯過！
屈指一算，「Eropolis」法國情色博覽會已經踏入第13個年頭，據舉辦單位嘅創辦人之一兼市場策劃Catherine Quesne指，猶記得喺2001年舉辦第一屆時，好多人都唔係咁睇好，只係佢哋抱住成為法國「第一個食蟹嘅人」心態，仍決定舉辦。話雖如此，第一屆為期3日嘅展覽，入場人士唔多，而參展商方面亦寥寥可數。
不過佢哋從未氣餒，時至今日，Eropolis會場超過6萬平方呎，參展商嚟自全球之餘，高檔品牌亦多不勝數，而每次展期更吸引超過3萬名人士入場，聲勢相當大。雖然面對歐洲經濟不景氣，但Catherine卻一啲都唔擔心，事關佢認為作為歐洲最大型嘅情色博覽會，不但有極大嘅吸引力，而且喺展期內，佢哋更安排咗極多娛樂節目，相信一定可以旺丁兼旺財。
Catherine咁有信心其實不難理解，事關佢哋不但網羅全球一線嘅大型情趣用品品牌，參加情趣用品展覽會，更安排咗大量索爆嘅四仔脫星同場助興，不但有助催谷銷情，更有助提升入場人次。此外，Eropolis嘅重頭戲不得不提每晚進行嘅大型艷舞騷。可能有人會話美國拉斯維加斯、荷蘭紅燈區，以至法國亦有唔少一流嘅艷舞騷可以睇，Eropolis嘅艷舞騷又有幾特別呢？
如果咁諗就大錯特錯，皆因Eropolis請嚟全球37位一線艷舞男女脫星輪流演出，單論人數同質素，已非一般艷舞騷可比。另外，佢哋嘅艷舞騷更糅合咗雜技、音樂劇、舞蹈劇等元素，務求畀到觀眾耳目一新嘅娛樂之餘，香艷又極盡官能刺激嘅舞姿，亦令觀眾讚嘆不絕，加上入場費只係11歐元（約HK$111），難怪吸引唔少人捧場啦！
撰文：魂