娛樂圈有條不成文嘅規定，就係藝人一定要高調，有事冇事都曝曝光，咁至會人氣不斷，大紅大紫；但亦有人喜歡低調生活，唔鍾意曝光，出道快到七年，但唔少媒體仲以為佢係新人，佢就係嚟自北京嘅模特兒那笛。
那笛嘅父親係白俄羅斯人，母親係維吾爾族人，所以佢擁有比漢人深邃嘅五官，加上高挑嘅身形，絕對係食呢行飯嘅好材料，但佢好少以混血美女自居，因為那笛認為，靚係冇標準，而且自誇幾靚或者自定標籤，那就更冇意思，所以出道多年都以工作態度和實力嚟爭取表現。那笛拍攝過嘅雜誌同廣告，超過一百個項目以上，除咗喺平面模特兒界火紅，深受歡迎之外，佢更係多才多藝，上過唔少綜藝節目，其中喺2010年上過嘅《非誠勿擾》節目，其秀麗外表同氣質，打動了不少電視機前嘅觀眾，令那笛人氣大增，自此工作量不斷。除此之外，那笛十分深閨，平時甚少曝光。
那笛除咗嬌滴滴咁做模特兒同埋節目嘉賓之外，原來仲有少為人知嘅剛陽一面，那就是出道至今，一共拍咗約五六套電視劇，當中演女警嘅就佔咗一半以上，據講劇集中唔少動作場面，都係由佢親身上陣，冇受過任何武術訓練嘅那笛，憑一身狠勁頂硬上。有人問佢擔唔擔心受傷？佢話從來冇擔心過；亦有人問佢有冇興趣憑動作演員方面進軍電影界？佢話好想有咁嘅一日。以那笛人靚身材好，加上咁肯拚搏，相信呢個願望一定會實現嘅，最好加埋啲性感，將完美身材露少少出嚟，更能吸引觀眾嘅視線。
簡介：那笛嘅專屬網站存放嘅照片唔多，但每輯都十分吸引，令你對那笛有深入嘅了解。
網址：www.moko.cc/nadi
出生地：北京
三 圍：33-24-35
身 高：172cm
撰文：龍四海