日本人對動漫嘅狂熱程度，真係位列全球之冠，喺日常嘅用品中，上至衣服鞋襪，下至牙刷毛巾，乜都可以同動漫扯上關係，但最意想不到，就係佢哋連車都可以動漫化，今年1月喺東京御台，就舉辦咗一場以動漫主題嘅「痛車」展。
「痛車」日文嘅意思即係改裝車咁解，即係車主把座駕貼上以動漫或電玩為主題嘅汽車貼紙，令座駕搖身一變，成為動漫化汽車。咪以為係小眾活動，今次車展就吸引咗過百位車主參加，佢哋駕駛動漫座駕嚟到會場公開展覽，當中有名貴房車，甚至高級跑車，此外，亦有七人車同埋貨車，連單車同小型賽車都有，真係講得出嘅車都可以動漫化。現場除咗令人矚目嘅動漫座駕外，最吸引眼球嘅，相信係一眾超級性感嘅Cospaly女郎，有啲係跟車主一齊嚟玩，亦有好多慕名以來，乘機騷一騷驕人嘅打扮同身材，有啲囡囡真係性感逼人，令人噴血。
有人問點解會有咁多Cospaly女郎出現？由於今次車展係自發參與，呢班囡囡唔係經公司邀請，全部都係自己走嚟，目的一來可以齊齊癲番日，二來由於遊人眾多，龍友無數，萬一自己嘅造型畀漫畫商或電玩公司睇中，當到正規展覽時，佢哋就會搖身一變，成為展商嘅正印花旦，有錢搵之餘仲會一炮而紅，所以吸引唔少素人Cospaly女郎出現。咪以為冇錢收就會冇咁放，佢哋都不知玩得幾癲，又捉人影相，又鹹豬手啲遊人，搞到現場咿嘩鬼叫。所以大家去呢啲展覽，畀啲Cospaly女郎抽水，千祈咪詐型，佢哋都係為咗份工啫，大家配合吓咪算囉！
撰文：小德