家陣嘅情趣產品種類繁多，但有人卻話冇乜大變化。相對以往，已愈嚟愈講求舒適性同外觀，並且追求多功能，先至可以得到玩家嘅歡心。踏入2013年，有情趣產品商進行預測，今年將有乜嘢新嘅發展。
據呢間情趣產品商嘅調查指，2012年嘅情趣用品銷量繼續上升，而喺歐美嘅普及度更同咖啡機差唔多，足見愈嚟愈多人接受情趣產品。數到去年最受歡迎嘅，仍然以女性情趣產品居多，只係佢哋預測今年將會變成以夫妻合用為主嘅產品，將會主導銷售市場，尤其係男女皆啱用嘅震動器，更會成為情趣產品市場中嘅主流。
依家智能產品入屋度極高，十之七八都有一部或以上嘅智能產品，而隨住產品愈嚟愈多元化同價格下調，呢間情趣產品商認為將會對性生活帶嚟極大嘅改變。除咗愈嚟愈多人，鍾意用呢啲產品嚟播鹹片作為前戲調情外，由於唔少智能產品都有拍攝功能關係，玩床上自拍嘅人亦會大增。佢更預言喺今年內，將會出現智能產品同情趣產品嘅混合體，實現智能化。
講到近年最受歡迎嘅成人讀物，相信非《Fifty Shades of Grey》（格雷的五十道陰影）莫屬。呢本喺2011年推出嘅情色愉虐小說，喺去年仍然深受男女愛戴，更刮起一陣愉虐風潮。呢間情趣產品商預期，踏入2013年後，由於大家對愉虐觀念改觀同得益於接受度提升關係，因此有關嘅產品數量及人氣亦會繼續增加。
過往每當提及情趣制服，大家都會第一時間諗起護理人員服、水手服、Cosplay制服等，只係嚟到2013年，呢啲制服將會變Out。喺時裝復古風嘅帶動下，復古內衣將會大行其道。不過呢啲復古情趣內衣卻糅合咗新嘅設計，相對以往更加講求貼身性，務求呈現女性體態美之餘，更加入情趣震動功能，唔再只係制服咁簡單。
撰文：魂