溪錢通常都係用嚟燒畀先人，等先人喺陰曹地府有錢使。而溪錢仲有另一個用法就係四圍撒，意思係布施畀遊魂野鬼，好等佢哋唔好阻住先人上路喎。而近年澳門旅遊旺區就出現一地「溪錢」，應該係一地色情服務嘅宣傳卡片同單張至真。點解卡片同單張好似撒溪錢咁撒到一地都係呢？據講，每晚9點左右，就會有人出嚟將大量呢類卡片同單張，放喺行人路嘅花圃旁邊，目的係吸引路人注意，再拎住佢上門幫襯。每當大風一起，單張同卡片就隨風「起舞」，咁咪吹到一地都係，好似撒溪錢咁囉。
香港有好多街道名都相當特別，例如大強街、磅巷以及交加街等等。至於澳門嘅街道名稱亦同香港有得揮，例如有咸魚里、西瓜里等等，當中仲有令人聯想起色情事物嘅街名，好似炮兵街咁。早前，網上更加廣泛流傳，指出澳門有條街叫做「X漆里」，仲話呢個名嘅來源，係因為多年前有好多工匠喺度做雕刻同油漆生意。最近，已經有人證實呢條街根本唔存在，不過就有另一個同樣具鹹趣意味嘅街名，就係位於澳門大堂區嘅「吉慶里」（拮慶你）喇。
撰文：賢