太古城有一間書店，特別之處在於全部都係日文書同雜誌，其中一個書櫃仲有好多情色書籍。呢類書籍喺日本被視為文學藝術，而當中被改編為情色電影嘅作品更堪稱為一代經典，我所講嘅正係SM中嘅經典之作──《花與蛇》。
《花與蛇》乃日本知名情色文學作家團鬼六（原名黑岩幸彥）嘅作品，系列共分九部小說，由於故事充滿色情、暴力同愉虐情節，所以於1963年推出第一部嘅時候，引起極大迴響，然後被日活株式會社改編為電影。《花與蛇》電影系列前前後後共有七部，不過最經典嘅就係2004年上映，由知名女演員杉本彩拍嘅一部。杉本彩飾演知名探戈舞蹈員遠山靜子，佢美麗、賢慧，魅力出眾，下嫁於企業家遠山隆義之後，兩夫妻感情愈來愈淡。
某日，遠山隆義被揭發虧空公款，為咗解決事件，於是向年屆95歲嘅黑幫元老田代先生求助。而田代就要求隆義帶靜子到其大宅表演艷舞，隆義一口答應。靜子赴會時始知被老公出賣，表演艷舞時更被大群男人用繩綁起玩弄。靜子心情沉重難受，但卻又漸漸發覺內心嘅慾望終於得到解放，整個人陷入墮落與快樂之間。電影故事情節充滿不倫意識，畫面又充滿暴力同SM場面，但係拍攝手法唯美，令作品極具欣賞價值。另一方面，年過四十嘅杉本彩魅力非凡，身材豐滿，被繩縛之時，面上嘅表情夾雜興奮與痛楚，感染力極強，令作品層次更高。趁住蛇年將至，回味呢齣經典，就夠節啦啦！
撰文：賢