最近有朋友死慳死抵，夜蒲可免則免，食飯最多都係每餐用50大元。問到當中原因，佢就話為咗儲錢買車，仲話有部車溝女更加容易，真的嗎？原來朋友嘅說話的確有根有據。日本一個汽車品牌早前進行過一項有關汽車與男女關係嘅調查，搵來六百多名20歲至40歲嘅男女協助，結果發現55.6%嘅女性會因為對方揸車同自己兜風而愛上佢。另外，兜完風之後，35%會期望下一次再約會，33%會同對方接吻，30%會樂意同對方拖手仔，嘩！換言之有車階級溝女嘅成功率真係大大增加喎！
歐美國家地方大，好多人都擁有汽車，而為咗方便呢班有車人士，就出現咗汽車旅館以及汽車影院。未來瑞士亦有一項設施，更能方便有車男士，就係汽車妓院喇。據消息指出，瑞士蘇黎世一個地區正興建一間汽車妓院。呢個建造費約二千幾萬港紙嘅妓院設計到好似停車場咁一格格，只要驅車入去，就可以幫襯玩車震，玩完就揸車走人。妓院將於出年夏季落成兼投入服務，到時就可以方便到急色又趕時間嘅玩家喇。
撰文：賢