今日係拆禮物日，大家係咪滿心期待咁對住收到嘅聖誕禮物，好想快啲將花紙撕個粉碎，睇吓收到乜嘢禮物呢？其實，份禮物點樣都唔緊要，最重要係送禮物嘅人係邊個，如果係自己心儀之人梗係最好，如果對方係火辣美女亦同樣令人開心。邊度有火辣美女派禮物呀？美國囉！
正所謂禮多人不怪，對人除咗要有禮貌，過時過節最好仲要有禮物。雖然西方人一向都唔似得我哋中國人咁好禮，但係到感恩節同聖誕節，佢哋就會慷慨解囊，大送禮物。而美國佛羅里達州一班舞孃亦唔例外，專揀聖誕佳節出動派禮物兼派奶。呢班舞孃工作於佛州一間夜總會，佢哋同夜總會負責人都好有善心，為咗令一班有需要嘅小朋友，例如係住院兒童分享到佳節嘅歡欣，所以每年都會大搞聖誕送大禮活動。
呢個派禮物活動有上千件禮物將會送到有需要嘅小朋友手中，當中有部分係來自社會各界捐贈，亦有部分係由夜總會負責人出錢買，所以禮物包羅萬有，好似係糖果、玩具、單車等等。而派禮物之前，夜總會就會派出一眾身穿火辣聖誕套裝嘅舞孃，喺禮物收集站做騷，目的就係吸引媒體採訪，提升舞孃同夜總會嘅知名度以及社會形象。咁班舞孃會做乜騷呢？除咗大跳火辣艷舞，仲會跳上將會運送禮物去派發嘅貨車上搔首弄姿，更會發晒姣咁情挑貨車司機，跳隻膝上艷舞，搵唔到司機嚟搞，佢哋連貨車都唔會放過，一於用身體省到架車「立立靚」。
班舞孃之所以發晒姣，玩得咁放蕩，原因其實唔單只係做騷有關，亦未必係因為佢哋飲大咗，而係因為夜總會每年舉行嘅派禮物活動，都係同當地嘅網絡電台The Bubba the Love Sponge聯合舉行。呢個電台一向都以出位聞名，唔單只會請舞孃同AV女優上去做節目，亦會自拍類似《死蠢鬥一番》嘅環節，搵班唔識死嘅勇士挑戰各種玩命玩意。由於電台極受歡迎，所以班舞孃梗係要落力演出博出位啦。而為咗令班賓客賓至如歸，舞孃打扮極盡性感之餘，仲會向電台嘅主持人送大奶，任對方抽水抽到飽！嘩！會唔會玩到唔記得幾時派禮物o架？
撰文：賢