乜嘢叫做Love Hotel？咪即係情趣時鐘酒店囉！事關日本唔單止AV出名，佢哋嘅Love Hotel亦憑住搞鬼又新奇嘅設計同裝修，喺國外同樣相當有名氣，不論係日本情侶，就連外國男女遊客亦忍唔住要開間特色時鐘房，嚟享受一下咁與別不同嘅氣氛。美國就有網站精選咗多間至為奇趣嘅Love Hotel出嚟，唔知邊間至啱你心水呢？
如果要數到日本至出名嘅Love Hotel，就一定唔可以唔提呢間位於大阪嘅Hotel Pamplona。事關呢間情趣酒店雖然外觀唔算突出，但佢裏面嘅房間卻相當有特色，不但有地牢密室、和風慾室，仲有最具人氣嘅監倉房！用鐵枝圍住嘅圓床不但畀到人好似置身監倉嘅感覺，加上房間提供埋情趣囚衣，等男女入到去不但可以玩得過癮，仲可以玩埋Cosplay，認真照顧周到呀！
大阪除咗Hotel Pamplona勁出名外，仲有一間叫做Hotel Lorie嘅情趣酒店同樣喺國內外享負盛名，而佢出名嘅原因亦同Hotel Pamplona一樣，全因佢每間唔同風格嘅酒店房，好似以太空船設計而成嘅太空艙、加勒比海盜特色房外，仲有個好似將熱帶雨林搬咗過嚟嘅雨林房，環境夠晒有特色唔在講，最鬼馬嘅就係佢將兩棵樹幹交叉一齊，變成綑綁架，設計相當有Heart。
伊利莎伯王后號呢隻咁出名嘅郵輪相信唔少人都聽過，只係有人居然將佢變身成Love Hotel，唔知大家又見過未呢？呢間外形十足十郵輪咁款嘅Love Hotel，從外觀睇一啲都唔會諗到佢竟然係間時鐘情趣酒店。外觀勁有氣勢嘅佢，每到夜晚佢仲會用射燈照射船身，氣勢更係逼人！加上裏面豪華嘅風格，入咗去真係唔想出番嚟呀！
每個女人都希望擁有浪漫嘅一晚，若然去到呢間以童話教堂為藍本設計而成嘅時鐘情趣酒店嘅話，相信女伴一定會覺得勁Romantic！據講呢間從童話故事灰姑娘中，獲得靈感嘅時鐘酒店，不但係爆房熱點，更係新婚男女洞房「性」地添！
撰文：魂