家陣不少剩女愛扮少女出嚟搵食，而o靚妹又掉轉頭扮熟女，巴打一唔小心好易中招！尤其喺夜場環境黑暗，要睇穿囡囡真實歲數確實有難度，但要直接問囡囡又似乎不智，點先可以旁敲側擊又唔破壞氣氛呢？今日就醒大家三招套料心得！
專家話問對方童年回憶，例如玩乜嘢玩具或者睇乜嘢節目大，一來可以加深認識，引出共同興趣，仲可以圍住話題閒扯落去，二來就係可以試探出囡囡有幾大，例如佢話細個鍾意去香港迪士尼，咁肯定係九十後o靚妹仔啦！相反答海洋公園最過癮，咁好大機會係八十後，若然連荔園都吹到兩嘴嘅，話係七十後你都唔信啦！
飲酒吹水最多嘅話題離不開打工仔怨氣，所以同囡囡傾偈順便問吓佢畢業幾耐，一般啱啱畢業嘅都唔會有戒心直接回答邊年畢業。相反愈迴避嘅證明出嚟社會打滾已好幾年，所以你單從答案嘅時間，就可以推測囡囡大概年齡，例如答05年畢業嘅，今年頂盡三十，但如果求其答你畢業咗五至十年，證明係佢想草草帶過，年紀細極有限囉！
作為蒲友一名，把口當然要口浪過油，最好袋定兩三招玄學或星座秘笈，咁鎅女就萬無一失！事關當你同囡囡打開面相話題後，對方防範之心會即時鬆懈，時機一到，巴打突然扮「高人」嚴肅一問佢生肖，囡囡事必如實回答，話唔定三圍、家底都話晒你知，之不過巴打要對生肖排列要好熟悉，搞錯咗可大可小o架！
撰文：祖