細沙海灘加藍天白雲， 已經正到人暈得一陣陣，若然可以摸住杯底，同個索女喺度把酒談心，咁就更加Very Good啦！美國就有旅遊網站，精選咗世界多個至啱型男索女把酒談心，兼可以喺度做私人嘢嘅靚爆海灘酒吧，讓各位男女可以去玩吓。不過話說回來，究竟乜嘢叫私人嘢呢？大家心照啦！
安圭拉喺邊？相信冇邊幾個人知。其實安圭拉係位於加勒比海，小安地列斯群島嘅其中一個小島。呢個咁偏僻嘅地方，之所以被美國人視為最啱男女去玩嘅勝地，除咗因為當地水清沙幼外，更因為酒吧嘅裝修相當有原始嘅風格，同平凡嘅小島襯到絕。當然，佢之所以被視為男女熱玩嘅地方，最重要嘅原因就係小島人煙唔多，加上夜晚黑麻麻，咁咪方便打得火熱嘅男女喺度……囉！
講到必去嘅海灘酒吧，點可以少得港人旅遊勝地嘅泰國呢？呢間位於布吉嘅海灘酒吧，不但擁有全方位三百六十度嘅無敵海景，瞓喺度邊歎酒邊睇靚爆海景，真係正到暈！若然飲得幾杯，想同女伴落去海灘度踢吓沙，玩吓水亦得。不過講到最重要嘅地方，就係嗰度有唔少熱情嘅泰國美女，對於單身嘅男士嚟講，呢點先至係最重要，唔通各位男士貪一支公歎靚景同美酒好浪漫咩？
位於南太平洋嘅庫克群島，出產種類豐富嘅熱帶水果，亦因為咁嘅原因，唔少美國旅客認為呢間海灘酒吧，以當地新鮮水果調製出嚟嘅Cocktail零舍好味，加上當地出晒名嘅靚爆日落景，更係成為唔少男女喺度定情嘅指定背景。當然，對於單身男女嚟講，呢個夕陽美景更係一個讓人動情嘅一刻，加上附近有唔少特色吊床，對一對乾柴烈火嘅男女嚟講，就唔使吓吓碌地沙。
有人以為巴西最出名嘅係森巴舞同嘉年華，原來佢嘅海灘酒吧同樣出名，就好似呢間除咗有美酒同細沙海灘外，更係玩樂無窮。事關佢唔單止係間海灘酒吧，裏面仲有水療、露天泳池、俱樂部等設施，咁單身男女嚟到就唔使驚冇嘢玩啦！
撰文：魂