早排有報道指，英國倫敦附近嘅Brighton Beach，有對男女曬曬吓太陽突覺慾火焚身，竟然當住男女老幼面前，喺海灘上曳曳，結果梗係畀人發告票啦！不過呢單嘢就激發起一個網站選舉，睇吓邊個海灘至啱曳曳，就選出以下三個正斗海灘。
被認為最佳曳曳嘅海灘，就係位於聖巴爾特島上嘅Colombier Beach！呢個島究竟喺邊呢？原來佢係位於熱帶旅遊勝地加勒比海之上嘅一個海島，唔怪之得投佢一票嘅網友都話，呢個海島最正就係環境一流，而呢個海灘更係水清沙幼，喺度曳曳唔使帶竹席，皆因啲沙細到好似瞓喺屋企張床褥度咁舒服喎！不過去呢個海灘曳曳係要付出代價嘅，事關島上嘅消費物價水平勁高。
睇個名就知道Pink Beach，直譯做粉紅海灘嘅地方有幾咁靚！唔講唔知，原來呢個位於加勒比海小島安地卡嘅擁有者，就係美國名嘴奧普拉，佢除咗會嚟呢度度假外，仲會對外開放畀遊客玩。由於有綿長嘅白滑海灘同溫和嘅海浪，因此吸引唔少人嚟呢度玩水上活動，當然唔少得慕名嚟參加各個黃昏海灘派對嘅遊客啦！望住一片夜空，喺微風吹拂下同至愛喺度碌地沙，諗起都覺得浪漫兼刺激呀！
位於意大利西西里島巴勒莫上嘅Mondello Beach，嗰度除咗可享受地中海宜人氣候外，仲因為水流關係，故此海水零舍乾淨，名副其實嘅清水藍天！有網友就話喺呢度曳曳最大嘅好處係選擇多，因為除咗可以喺沙灘度玩之餘，仲可以試吓喺水中交戰。據呢位網友講，因為啲水好乾淨，唔怕有細菌喎！此外，有網友更稱當地民風開放，就算畀人見到都冇有怕咁話。當然，佢哋係吹水居多，只係講真，呢個海灘咁靚，就算唔曳曳，裸曬都絕對冇問題！
自從出咗野戰單新聞後，Brighton Beach果真係一炮而紅！不過唔講唔知，呢個海灘以前其實係貴族同有錢人嘅度假勝地，只係隨住度假習慣嘅變化，呢度亦開始平民化，成為唔少倫敦市民一家大細度假嘅地方。既然係合家歡勝地，好心就咪喺度玩啲咁激嘅嘢啦！
撰文：魂