溝女專家話初次見面嘅男女，只要企喺對方左便45度咁交談，就會特別令對方產生好感，係咪有效真係要試過至知。其實男女初次見面，企位唔係咁重要，反而話題先至係頭痕，今日就由台灣兩性專家教大家三招最煞食嘅傾談話題。
年輕女生對神秘占卜術，大多數都會有興趣，想初次見面吸引對方，同佢談談星座就最好不過。如果你對星座有做過一啲研究，真係可以同對方傾成晚，印象分攞足一百分，但萬一遇上不喜歡星座嘅囡囡，你就要投其所好，有一套對星座討厭嘅說辭，唔好一句唔喜歡就企喺度，要進可攻，退可守。
第二位：
其實等於問囡囡喜歡邊個歌星？但家陣咁問就會很過時，因為時下年輕人喜歡嘅歌星唔會只係一兩個咁少，數一堆出嚟又好冇內涵，加上囡囡話喜歡邊個歌星，又好似自貶為追星族，所以好多時都會拒絕回答。但如果問囡囡有冇睇演唱會？一來當場騷咁睇，冇話喜歡邊個，就會顯得囡囡格調高好多，而且屬高級消費，乃身份象徵。
第三位：
吃喝玩樂嘅話題，個個年輕人嘅開場白都係咁樣，你唔悶囡囡都悶，所以想奇兵突出，最好係以社會話題嚟打動對方。台灣就問佢有冇去某某嘅造勢晚會，而香港最好就係問佢有冇去遊行，就算囡囡冇去，你都可以打蛇隨棍上對佢講大堆理論。當然，事前最好讀定幾篇政經專欄嚟打打底，但太深奧佢哋會掉頭就走。
撰文：小德