近排英國女作家特魯頓著作嘅《格雷的五十道陰影》愉虐小說，唔單止風靡全球，銷量更超越丹布朗嘅小說《達文西密碼》，最重要係讓愉虐呢種小眾玩法，引起男女嘅興趣。不過如果想體驗愉虐究竟係乜嘢嚟嘅話，原來英國倫敦亦有唔少專睇愉虐表演嘅地方，不但讓大家見識一番，仲可以體驗愉虐有乜嘢好玩添！
如果要睇愉虐騷，梗係要搵間最出名又最豪華嘅嚟睇啦！既然係咁嘅話，Torture Garden就絕對係首選。呢間被喻為全歐洲最大型嘅愉虐夜總會，唔單止每晚愉虐演出都吸引過千名觀眾入場，而佢最讓人着迷嘅地方，就係佢嘅裝飾完全體現到愉虐嘅主題，從劇場嘅室內裝修、舞台設計、娛樂設施、酷似監獄嘅地牢，以至服務員嘅制服，全部都體現到愉虐嘅色彩。此外，佢哋更要求觀眾要以愉虐造型入場，否則係唔會畀你入場睇騷，真係相當有風格呀！
想睇愉虐騷唔一定要去夜總會、俱樂部同劇場，去酒吧一樣可以！邊間酒吧咁有特色，可以邊歎啤酒邊睇愉虐真人騷？佢就係Volupte嘞！呢間位於倫敦金融區地下，並鮮為人知嘅酒吧，每晚都吸引識貨之人入場，而酒吧內每晚定時定候都有一身緊身皮衫，手執九尾鞭嘅索女周旋喺一眾酒客之間，邊演出邊同酒客大玩愉虐遊戲，表演極具互動性。除咗愉虐演出外，酒吧更有各種極富娛樂性嘅表演環節，好似灰諧棟篤笑、火辣艷舞、奇幻魔術等。
緊身膠衫、膠褲、膠胸圍同底褲係愉虐嘅主要元素之一，因此講到愉虐演出，就梗係唔可以冇膠份啦！講到以膠會友嘅演出，Skin Two Rubber Ball一定唔可以唔提，事關呢個演出唔單止搵嚟一眾索到爆嘅惹火女郎，喺舞台上勁跳艷舞，而以全身包膠扮相登場嘅佢哋，更會喺台上大玩各種誘人嘅情趣玩具，唔單止睇嘅人興奮，好此道者更係High到尖叫同亂叫。不過呢個表演係唔定期兼唔定地點演出，想知道嚟緊呢個演出將會喺邊度嘅話，可以登入佢哋個網站度睇吓。
撰文：魂