去美國旅行除咗希望遊山玩水歎世界外，亦有人希望可以有段異國艷遇，皆因美國索女夠開放，你睇吓哈利王子喺拉斯維加斯玩到幾開心就知啦！有見及此，有美國旅遊網站就選出四個最易出現艷遇，又有最大機會溝到索女嘅城市。唔知大家睇完呢個排名後，會唔會即刻攞假去玩番轉呢？
紐約市係美國著名嘅大都會之餘，仲有不夜天嘅美譽，當中尤以曼哈頓至為聞名。事關當中不但有各種大型酒吧同的士高，而曼哈頓嘅美女更係出名聰明、夠索同開朗，最重要就係佢哋好鍾意結識各國男士。只要喺晚上抽出三到四粒鐘，喺呢啲夜場流連嘅話，就能夠輕易識到一眾紐約俏嬌娃，同佢哋把酒談心確係妙不可言，難怪被選為艷遇之城嘅第一位。
講到去豪玩，點可能冇拉斯維加斯份呢？不過原來呢個地方，不但係著名嘅賭城，仲係個艷遇出現指數相當高嘅地方！據有關方面解釋，呢度嘅單身女性密度係全美國之冠，而佢哋更集中出沒於各大旅客熱點，好似酒吧、的士高同夜總會等地方。喺索女雲集嘅情況下，命中率自然相應提高。講真，班女喺呢啲地方出現，你話佢哋唔係等仔溝，我就真係唔信喇！咁多誘惑，難怪連王子都玩到忘晒形啦！
想有艷遇唔一定要自己做主動，有啲索女亦鍾意反客為主，而講到最為主動溝仔嘅女士，向來以熱情奔放又活力十足嘅邁阿密索女，必定係坐亞望冠。有調查指美國嘅女士中，以邁阿密嘅索女至為主動，見到心儀男士都會主動出擊，因此艷遇出現嘅機會好高。此外，邁阿密亦係派對集中地，各種派對如泳池派對、酒吧派對、啤酒派對等晚晚都有，想溝女又真係好似好易喎！
新奧爾良都係艷遇之城，係真唔係呀？冇錯！理由就係呢度有好多專為女士而設嘅酒吧，每晚都有嚟自各方燕瘦環肥嘅索女，喺度同姊妹把酒談心。可能有人會問，女士飲酒同艷遇有乜關係呢？咁就好簡單，當班女飲得興奮又亢奮時，再喺門口度同佢哋嗲番幾句，想得到芳心就話都冇咁易。之但係喺等待嘅過程中，就要考吓男士嘅耐性喇！
撰文：魂