男人畀女飛，面子要緊之餘，嗰啖氣有時又真係幾難吞得落。想向前女友報復嘅話，又唔使諗得好極端，搵個比佢更索嘅索女激吓對方，已經足以乜氣都消晒。美國就有成人網站推出服務，報稱可以提供人氣脫星畀甩拖男，嚟個報復女友大行動，服務據講仲相當周到添！
呢個叫做復仇套餐嘅服務，聽個名以為好似好極端，只要睇真啲卻發現，原來所謂報復前女友，只係Send啲「現任」女友嘅靚相、慾照畀對方之餘，甩拖男仲可以搵個新任哎吔女友喺床上出番啖氣添！據提供呢種服務嘅網站表示，呢個套餐最好嘅地方，就係可以因應甩拖男嘅要求，度身訂造唔同嘅服務內容，等對方可以下番啖氣。雖然聽落幾特別，但係咪真係有甩拖男會求助於佢哋呢？網站指從今年初推出服務以嚟，佢哋已經幫助超過三十個甩拖男，睇嚟反應應該唔錯。
為甩拖男提供一條龍嘅復仇行動，唔知內容會有啲乜嘢呢？一般嚟講標準套餐包括靚相同慾照提供服務，即係讓甩拖男同心水索爆脫星所扮演嘅哎吔女友，影番輯孖頭相、拍拖相同床上相，跟手喺「唔覺意」嘅情況下送畀前女友。當然，床上相梗係唔單止係兩個人碌喺床度咁簡單啦！甩拖男如果想影啲更激嘅相，就要畀多啲錢，仲可以同哎吔女友有更進一步嘅接觸。雖然喺介紹度冇講明係乜，但心水清嘅男士相信都心領神會。此外，甩拖男如果想報復得盡啲嘅話，仲可以嚟個街上「邂逅」、臨時派對Partner等嘅服務，而價錢同樣要再斟過。
雖然話半年嚟已經成功幫助超過三十位甩拖男，向前女友嚟個大報復，但係實際上係咪真係咁有效呢？有試過呢個服務嘅甩拖男就話，報復感又真係幾大o架！佢就試過帶埋呢位哎吔女友，一齊出席前女友嘅生日派對，前女友見到佢身邊呢位既索又火辣嘅「現任」時，睇見佢眼中嗰種妒火已經值回票價，當然講到最讓佢回味嘅，卻係可以趁呢個機會一親索爆脫星嘅香澤，呢個機會就更係難得。不過呢位玩家補充指，如果要搵嘅話，記得千祈唔好揀啲有啲名氣嘅脫星，否則對方有睇開四仔嘅話，發覺對方原來係個脫星，咁就即刻穿煲喎！
撰文：峰魂簫