綠豆沙：#o# 嗰日睇新聞發現家陣好多後生仔，都鍾意蒲老蘭識醉娃，諗住可以食免費餐，點知事後卻搞到一身蟻。其實食醉娃真係咪亂咁試，尤其係新相識嘅女仔，咪因為貪新鮮同刺激，結果事後搞到畀人又拉又鎖，貪一時之快搞出個大頭佛，你話又有乜謂呢？
杧果乾：*~* 話雖然係咁講，但係呢啲嘢卻時有發生，咁就講明咗一件事，就係好多男人都係衰鹹濕，以為飲到半路時，見條女又挨又畀你攬，以為可以得米。只係佢哋冇諗過，若然跟住落嚟有下文嘅話，理虧就會係自己，因此我從來都唔敢亂咁嚟呀！
豆腐花：QoQ 其實女仔都應該識得保護自己，尤其係嗰啲Friend疊Friend嘅場合，人哋係乜嘢人你都唔知，點知對方抱住乜嘢心理嚟o架？加上如果你嘅舉止稍為開放啲，對方以為你係個「玩得」之人，當你飲大咗後發生乜嘢事，相信大家都心照啦！
靚喳喳：^v^ 講真嗰句，醉娃有乜咁好玩，除咗真係想呃食免費餐外，我真係諗唔到有乜理由囉！話說嗰次同班老友唱K，囡囡畀班老友隊冧咗，跟手入到房佢唔係攬住個馬桶係咁劏，就係大字形咁攤喺度，一啲樂趣都冇，真係唔明啲人諗乜嘢嘅。