齊歡暢：+_+：香港最近有調查發現，剩女人數大增，適婚單身女性多過單身男性，除咗人口出生失調外，部分原因係近年離婚個案多咗，有大量失婚婦人，重投單身巿場。另外，有大量男性與異地女性結婚，特別係內地囡囡，所以令單身男性數字大減，因而令剩女湧現，加上佢哋高學歷、高職位同高要求，亦難搵伴侶。
同慶賀：#o#：咁好環境，我哋呢啲軟飯王，正係出手嘅好時間，聽講年紀愈大嘅剩女收入愈高，有啲閒閒哋一個月十萬八萬收入，加上有啲仲儲咗唔少私己錢，隨時買層幾百萬嘅樓都冇問題，唯一嘅缺點就係公主病，唔係，係女王病嚴重，但我哋呢啲專業軟飯王，對公主定女王都絕對冇問題，保證令佢哋開開心心，舒舒服服。
大團圓：*~*：呢班剩女，佢哋之所以嫁唔出，好多時都係對愛情太過充滿幻想，自小畀愛情小說毒害，覺得男朋友個個都係白馬王子，自己就係白雪公主，計我話最好就係開設一啲專為剩女服務嘅婚介公司，每次約見男仔就收佢一萬八千，但其實只要搵啲靚仔嚟滿足佢哋嘅愛情夢想，相信啲剩女一定會爭住嚟捧場令夢想成真！
笑開顏：^v^：
我就幫班剩女講幾句，佢哋接受精英教育，才高八斗，出嚟社會打拚，亦位高權重，冇理由隨便搵茶餐廳阿強、食蕉阿富做男友，要求高啲又有乜嘢錯，有幾多個似我女朋友咁深明大義，唔計較我揸貨車，佢喺金融公司做總監月入十二萬，出入名貴房車，上圍更有36G，但體重就有203磅，畀佢一壓，真係命都冇呀！