老枯子：€※€：美國有個29歲女碩士生，畢業後自己搞咗個網站，公開提供擁抱服務，客人只要花60美金，即係大約468蚊港紙，就可以畀你抱90分鐘，據講推出呢個服務之後客似雲來，有人同佢計過，一日做9小時，就可以接6個客，每人收60美金，一日收入都二千八百幾蚊港紙，一個月做廿日就有五六萬啦！
大翻鼠：^v^：我都有睇呢單新聞，起初以為呢個女碩士生一定係掛羊頭賣狗肉，從事色情活動，事關報道話佢九成客人都係男性，仲唔係大有文章？但原來唔係，成個過程佢真係只畀客人抱抱，令到客人得以慰藉，不過擁抱當中，男士會出現生理反應，佢話呢個係好平常嘅情況，平常還平常，齋有反應90分鐘，你都咪話唔辛苦。
秦仙山：@o@：唔知可唔可以選擇擁抱嘅動作呢？如果可以，我就喜歡面對面，身貼身咁抱，至於佢喜歡喺上面定係喺下面，就由佢決定，我個人喜歡比較傳統啲，覺得男人喺上面會更得到慰藉，當然，如果囡囡要求佢喺上面，我都唔反對，何況90分鐘咁長，我哋可以一時男人喺上面，一時換轉女人喺上面都唔錯，慰藉效果更大。
陳小者：&▼&：其實搞啲咁嘢，囡囡嘅樣貌真係好重要，我睇過佢幅相，好一般啫，就算加埋女碩士生嘅大名，都冇理由抱一抱就收咁多錢，好似我咁兩科碩士畢業，樣子又好，身材又正，喺國際企業每月工作30日，每日12小時，期間仲要畀高層抽埋水，都係萬幾蚊人工一個月咋，早知係咁，我都開網站畀人擁抱吓仲好啦！