不論你落的士高嘅目的係為咗跳舞定溝女，都會好享受嗰種熱鬧同火辣氣氛。不過講到至開放、玩得又夠喪嘅的士高，就一定唔可以唔數荷蘭首都阿姆斯特丹。除咗因為民風開放外，亦因為佢哋出名多好玩嘅的士高，而早排有荷蘭旅遊網站，推選出3個至火熱嘅的士高出嚟，間間都有唔同嘅特色o架！
有唔少經常蒲D嘅男女，都好鍾意蒲專玩地下音樂嘅的士高。如果閣下亦係同道中人嘅話，咁呢間位於阿姆斯特丹嘅Paradiso，就一定至啱你口味。呢間將教堂改建而成嘅的士高，內裏嘅裝修風格相當獨特，唔似一般的士高咁天花只得射燈，歌德式嘅天花同二樓圍欄，加埋好有宗教特色嘅浮雕，襯埋強勁嘅非主流迷幻音樂，氣氛有幾迷幻得幾迷幻，絕對係喜愛Underground嘅蒲友必去勝地。
如果你係專業蒲友嘅話，一定聽過Jimmy Woo呢間潮男型女必去嘅的士高個大名。呢間被譽為當地美女同野獸夜生活核心地嘅的士高，除咗擁有英文店名外，仲有個相當特別嘅中文名「武巨鳴」。Jimmy Woo每晚都請嚟紅到爆嘅DJ現場打碟，配合天花板超過兩萬個燈膽，加上強勁嘅音響，難怪佢被視為蒲友必去嘅地方。不過大家去嘅同時，有需要嘅話記得帶定個耳塞，因為啲音響真係好勁呀！
咪以為的士高只係得DJ現場打碟，其實有唔少的士高，都有自己一套音樂風格。好似呢間Trouw咁，佢就主打重金屬搖滾，仲最愛搵嚟一啲名不見經傳，而又相當有實力嘅搖滾組合演出，因此呢度唔單止係舞林高手跳舞嘅熱點，仲要係一啲鍾意重金屬音樂愛好者必去嘅地方。此外，呢度嘅激光效果亦相當著名，更自創唔少激光運用技術，確係玩樂同欣賞藝術嘅好地方。
有人話的士高裏面三教九流嘅人乜都有，其實呢個係錯誤嘅觀念，有啲的士高可以好Grand又有品味，例如呢間Club NL，就係一個好例子。相當有格調嘅裝修，加上勁索嘅Dancer及靚酒。每樣嘢都話畀嚟玩嘅蒲友知，呢度係個講求品味嘅地方。
撰文：魂