最近聽老友話深圳有啲桑拿場，一啲技師竟亂收代支，而代支價錢又冇劃一標準，一時低，一時高，萬一客人唔畀咁多，就會受到冷言冷語對待。有老友更畀對方出言恐嚇，不斷發短訊咒佢發生意外，出嚟尋開心啫，使乜搞成咁呀？
話說呢位老友經常幫襯嘅桑拿場，按摩三個鐘收費108蚊，如果係會員仲有特價添，由於收費咁平，雖然話明不收代支，但客人都會例牌自動自覺，簽少少益吓啲技師，而一般情況就係每個鐘20大元，如果揼三個鐘，就例必揼低60蚊，加埋公司108蚊，落樓差唔多要二百大元，客人旨在揼骨都冇所謂，但最近嚟咗批新技師，佢哋要求客人揼三個鐘要一百大元小費，如果係假日或者人多嘅日子，仲要求百五蚊咁多，一般新客唔知道，都會被佢哋撳住搶。
一啲幫襯開嘅熟客，當然唔肯就範，何況簽代支係你情我願，客人一分錢唔畀都可以，但畀技師撳住搶就勢係假，而嗰位老友就係熟客，咪同佢講理，點知個技師落唔到台，竟然大罵客人，又話佢係死窮鬼，冇錢就咪嚟幫襯，幾十蚊小費都畀唔起之類難聽說話。為免有失身份，老友於是向經理投訴，事後得知罰咗個技師三百蚊。嗰位老友又有朋友遭呢個技師勒索小費，於是再向桑拿場反映，今次卻換嚟電話短訊恐嚇，話佢多管閒事，又話佢要出入小心，使唔使搞成咁呀？
地點：深圳
語錄：代支亂收真唔掂，投訴之後冇改善，短訊恐嚇日日增，妥善管理快出現。
撰文：賢