胡塗松：*~* 今年攞到奧運轉播權嘅電視台，真係諗得到，佢話可以用一蚊美金就將咁多日嘅轉播權畀咗兩間免費電視，聽落好似好着數，但係只能播出佢哋嘅節目同埋廣告，據大婆台講，估計食咗佢哋約2,000分鐘嘅廣告時間，每分鐘廣告費最少都幾十萬，加起嚟真係天文數字，所以俗語真係講得啱，光棍佬教仔，便宜莫貪。
胡民苦：#o# 其實呢招真係幾絕，我即時諗到條相似嘅絕橋，就係你可以用一蚊美金，喺我手上娶個靚女返去，但係洞房嘅細節就由我全權安排，做老公嘅不得異議，而且從此之後，老公嘅所有收入，都要交晒畀呢個老婆保管，佢喜歡點用都得。呢條橋真係諗起都興奮呀！一於同阿珍商量吓，搵個冤大頭嚟呃吓都好。
胡大牛：^v^ 其實娶到個靚老婆返屋企，蝕少少錢都預咗，好似電視台有發言人話，你賣轉播權我貴貴都買，就算真係蝕晒啲廣告收益，都係好小問題嘅事，最大嘅問題係節目製作全部落喺人哋手上，等同樓上師兄講，洞房嘅細節全由外人話事，佢唔畀你洞房或者由別人嚟替你洞房都好啲，最大鑊係佢齋玩SM，到時真係唔死都一身潺。
胡一刀：+_+ 計我話奧運係大圍嘅事，以後理應由政府購入轉播權，咁我哋全部都唔使錢睇，至於電視台想搵廣告，就要製作更好嘅節目，吸引觀眾，咁就一家便宜幾家着，就好似想搵靚女，我就建議政府帶頭，倡議娼妓合法化，於是囡囡大量供應，顧客們只要睇吓邊間場嘅消費平或者服務出色，就選擇幫襯，免得家陣七國咁亂。