陳世美：*~*
最近中央喺13間中校嘅畢業生物色服務員，但條件比選美仲嚴格，囡囡要17至20歲，身高1米65至1米72，相貌當然要清秀，口齒伶俐，舉止大方，身家清白，行路時唔可以內八字或外八字，但最搞笑嘅就係要囡囡皮膚白滑，冇疤痕又要冇紋身，有人問囡囡紋個字喺屁股，關你哋乜嘢事呀？
笨占：^v^
條件咁辣，擺明就唔係招服務員咁簡單，有網友話可能為咗畀班高官選妃至真，唔係人哋有紋身又關你事？但亦有網友代佢哋解釋，話高官安分守己，唔會亂嚟，只係因為要招待外賓，所以一定要搵啲高質嘅小妹嚟招待客人，如果唔係堂堂十三億人口嘅大國，搵幾個靚女都冇，真係可能會畀人睇低o架。
人人樂：#o#
班高官大老爺，當然德高望重，絕對唔會向呢班剛畢業嘅小妹打主意，但佢哋啲官二代或官三代就好難講，佢哋周不時都可以進進出出，見到靚女自然寒暄幾句，而且佢哋年紀相若，只要加多兩錢肉緊，美言幾句，呢啲未見過世面嘅小妹，九成都會上當，所以入得去做絕對九死一生。
多利王：+_+
你哋咪講到咁恐怖，就算真係畀人溝咗，人哋全部係達官貴人，有頭有面，一定會負責任，就算做唔成官太，將來無論工作或者發展，都會有人照住，順風順水，比起讀多四年大學，出路可能仲好，所以大把人爭住入去做就係咁嘅原因，我都不知幾恨入去做，可惜我只得1米55咋！