有朋友話喺夜總會見到啲囡囡入嚟打招呼時，有部分身穿劃一整齊制服，但亦有幾個身穿便服，問我點解？即刻搵嚟資深夜場老總深哥解答。深哥話家陣法例規定囡囡要着制服侍客，證明佢哋係公司嘅職員，但報上去嘅數字往往比實際嘅少。
深哥話例如一間場有100個囡囡，但佢哋一般只會報50個，一來有關方面嚟查牌時，查夠50個就夠，唔使查晒100個囡囡，試諗吓，一個囡囡查一分鐘，100個就100分鐘，即係成兩個鐘頭冇得做生意，都咪話唔嚴重。此外，深哥話佢哋唔係存心隱瞞，而係囡囡本身流動性大，明知佢都冇心喺度返工，或者存心騎牛搵馬嘅，所以都懶得報上去，免得三朝五日又要去更改，自己唔煩，人哋都煩，所以有登記嘅囡囡，就會換上制服見客，但一啲冇登記嘅就可以便服見人。
深哥話如果客人唔詐型，囡囡坐一陣之後就會換回便服侍客，但咪以為囡囡咁做係睇你唔起，而係囡囡着住制服侍客，有好多親密動作都唔方便做，但如果換回便服，就唔當佢哋係職員，只係客人帶嚟嘅朋友，咁客人同囡囡喺現場裏面點親熱都好，都唔關佢哋事，但如果着住制服，客人隻手唔規矩，畀執法人員發現，唔單止客人有事，連帶囡囡同間場都會被檢控，所以囡囡一時着制服，一時又換便服，就係咁解！所以囡囡要求換便服，記住咪詐型，否則蝕底嘅可能會係自己。
地點：東莞
語錄：囡囡制服有玄機，着換有序益你哋。
撰文：小德