台灣有男士雜誌公布咗最新十大性感女神嘅排名，當中有唔少新面孔，人氣一姐林志玲卻冠軍不保，跌咗落去第三位，至於能夠壓倒佢嘅，相信實力一定有番咁上下。結果馬上公布，睇吓你哋又會唔會投下神聖一票。
安心亞係綜藝節目主持人，出道都有一段日子，一直以可愛形象示人，周不時都大晒事業線，令觀眾同網友留下深刻印象，直至舊年年初推出佢首本超性感寫真，令佢人氣急升，所到之處例必有大批粉絲守候，加上舊年做埋長壽節目《我猜我猜我猜猜》嘅替班主持，人氣一時無兩，今年登上冠軍寶座，絕對實至名歸。
三圍：34、25、35
身高：171cm
職業：節目主持
林采緹係一名平面模特兒，出道都有一段日子，以新人嚟講，工作都接唔少，期間更接咗唔少性感照片拍攝，出嚟嘅效果都唔差，引起唔少網友嘅注意，可惜始終未能爆紅，但自從佢以動漫作品《海賊王》嘅蛇姬造型亮相後，馬上引起廣泛關注，最令人意外嘅就係林采緹竟可以一口氣殺上第二位，令一姐林志玲都要屈居其下。
三圍：33、23、35
身高：168cm
職業：平面模特兒
林志玲係台灣女星中少有能夠紅遍兩岸三地，自出道來人氣一直高企，同類型嘅票選活動，佢更連續囊括幾屆，實力毋庸置疑，但今年竟跌至第三位，主要原因係舊年志玲參與活動較少，冇乜新戲，於是又冇乜宣傳，最弊就係冇新性感照片面世，啲網友睇極都係啲舊相，想唔變心都唔得，所以希望佢今年加把勁，以挽回劣勢。
三圍：34、23、35
身高：174cm
職業：影星
撰文：小德