家陣天氣愈嚟愈熱，對天體愛好者嚟講，係同天地嚟個親密接觸嘅好時間。不過想裸得開心又玩得Relax，究竟有乜度假屋選擇呢？美國就有旅遊網站，精選咗三個至正嘅天體度假屋，當中不但各具特色，而且仲唔怕畀啲不速之客騷擾，讓大家安心裸嚟歎！
位於加勒比海嘅荷蘭屬地St.Maarten不但有極長嘅海岸線，而且當中更有唔少細沙海灘，加上當地天氣風和日麗，單係呢點已經吸引唔少男女去當地放暑假。當地嘅Club Orient Resort自設私人海灘，隱密度相當高之餘，海灘更係既長且平，玩乜嘢運動都咁啱，加上海面風平浪靜，因此吸引唔少人鍾意喺度玩水上活動，尤其係潛水更係相當受歡迎，至啱初哥裸體愛好者嚟度假。
墨西哥除咗出名有仙人掌同沙漠外仲有乜？當然係海灘啦！對天體愛好者嚟講，海灘係必不可少嘅元素，而裸體度假屋Punta Serena就深明呢個要點，不但擁有一個私人嘅靚爆海灘，而當中更係有個非常貼近海灣嘅鏡面泳池。日頭驟眼睇落去，呢個泳池好似同海水融為一體咁，夜晚去浸嘅話，更有種好似同天體合一嘅感覺，絕對係個浪漫兼舒服嘅裸體勝地。
美國加州出名陽光與海灘，因此有裸體度假屋入選絕對唔出奇，奇就奇在呢間度假屋，竟然唔係臨近海灘，而係位於比較接近內陸嘅地方！乜海灘唔係裸體勝地嘅重要元素嚟咩？原來呢間度假屋嘅賣點，在於提倡綠色生活，因此佢附近有大片森林包圍，而當中更有一大片青翠嘅草地，不但可供人們喺度曬太陽，夜晚仲可以瞓喺度睇星星，甚至有人專登喺度舉辦裸體婚禮添！
撰文：魂