睇娛樂版見啲阿姐級明星，周不時都要「萬歲」，即係買嘢返嚟畀啲工作人員食，原來喺日本AV界亦有咁嘅規矩，啲阿姐級女優第一日開工或者煞科嗰日，都會「萬歲」慰勞一下大家，至於最常見買啲乜嘢食物，馬上同大家倒數一下。
壽司係女優最常請客嘅食品之一，但由於價錢不菲，餵飽晒啲工作人員，冇幾千蚊港紙都唔使旨意，所以一向都係阿姐級嘅巨星至會咁做，但有唔少二線頭想充一線嘅女星，都會硬着頭皮請客，希望可以收買人心，所以壽司佔據「萬歲」榜嘅第四位。
而第三位就係水果，買水果請客嘅，無論乜嘢級別嘅女優都有，但大家咪以為水果價錢好平，有啲日本嘅溫室水果，真係貴到幾百蚊港紙一個，買幾個返嚟，都要成一兩千蚊，所以真係唔講得笑，當然工作人員食到貴價水果，心情一定會唔同啲。
女優成日都請工作人員食嘅，一定係零食，日本嘅零食五花八門，執佢幾百蚊港紙就有一大袋，攞番嚟大家都有得食，雖然冇乜嘢驚喜，但工作人員都會知道你有佢哋嘅心，特別係初出道嘅囡囡，就經常用零食攻勢嚟同工作人員建立關係。
講到請人食嘢，最方便又可以顯露身份嘅，就係便當，事關平嘅幾十蚊港紙，但貴嘅幾百蚊都有，真係悉隨尊便，新人大多請食平價便當，但阿姐級就會請食高級便當，食完之後冇工作人員唔會唔感激你，地位即時超然好多。
撰文：祖