笨占：9^9
最近台灣有間外語學校，由於女生着嘅衣服太過隨便，於是貼出通告，嚴禁女生以熱褲短裙或者清涼裝扮返學，呢張通告一貼出，唔止呢間學校震動，連帶好多當地嘅大專學校都覺得女生着性感裝束返學，究竟應唔應該管制呢？計我話佢哋個個咁性感，男生實第一個舉腳贊成。
我話校方太過分，咁樣發通告出嚟，簡直就係破壞晒社會嘅核心價值。一係呢張通告，喺未有諮詢嘅情況下發出，欠缺民主精神，二就係扼殺女生嘅穿衣權利，嚴重違反人權，損害人身自由，三就係觸犯平等條例，只許男生清涼，不許女生性感，簡直就罪大惡極，負責通告嘅老師真係要引咎下台。
我就支持校方嘅做法，試想啲女生個個迷你裙熱褲，更配埋小背心或者大Deep V，舉手投足間都會輕易春光乍洩，學校嘅男同學，個個血氣方剛，試問點忍得到，萬一搞出啲乜嘢風化事件，學校嘅聲譽都唔知點算，而且女生個個都咁性感，唔好話學生，有時做老師嘅都難頂，所以都係密實啲好，咪咁隨便引人犯罪嘛！
我堅持女生有着清涼衣服嘅自由權利，就算佢哋全裸返學，我哋都要尊重個人嘅自由，如果校方唔妥協嘅話，我建議女生們採取進一步嘅行動，唔排除罷課、罷考，我哋更會協助女生們爭取合理嘅權益，但如果係我個女嗰間學校，我當然贊成校方要求女生有咁密實得咁密實啦！女仔人家露咁多肉畀人睇，容乜易蝕底呀！