綜合多位資深玩家爆料指，近年內地大型會所式夜場倣效賭場式經營，場主將酒店內娛樂場所下判，由廳主招攬有「質素」人客到場耍樂，廳主從中賺取佣金，聽聞高峰期每月拆幾十萬數，真係好過做生意呀！
當然呢啲廳主肯定係地方勢力人士，唔係你同我都做到！但點解帶人入夜場攬吓女，去酒店瞓番晚就月入幾十萬呢？唔使問都知有陰謀啦！有玩家大爆，通常廳主對第一次見面嘅巴打來者不拒，表現相當豪爽，請飲請食，當正你係兄弟招呼，實情係氹你入局：「嗰次我同師兄一行六人去新場玩，由於我哋全部人都未見識過，到場後就有個類似『睇場』後生女帶住，先入夜總會揀女，再拖去中菜廳食飯，飲飽食醉再唱K，連酒店都係阿女幫我哋登記，離開又車我哋去車站，好招呼到唔信！」
巴打們念念不忘，兩星期後再組團出發，點知今次阿女就安排佢哋先食飯，原來係「高清飯局」，即係光豬陪食，囡囡剝清光坐大髀唔只陪食仲陪賭：「食飽後就拉咗幾個麻甩佬入嚟話玩兩手，本來我見自己人多玩吓無妨，結果一賭就三粒鐘，唔覺意每人輸萬幾，佢有冇出千我唔知，只知自己集中唔到精神，聽各路師兄講都有類似遭遇，有人仲試過被挾返香港，總之大家小心啦！」
特攻語錄：酒店高清飯局，廳主迎賓混熟，囡囡氹你入局，輸到人客木獨。
撰文：馳力王