如果有食肆提供歐陸及日式食物，而且全場以美少女嚟招待，相信好多人都會有興趣去捧吓場，但如果全場囡囡仲以性感三點式示人，係咪吸引力仲大呢？呢個唔係天方夜譚，喺日本就有食肆，以三點式美少女嚟做招徠，難怪客似雲來。
呢間食肆目前已有七間分店，最新一間分店喺呢個月9號開張，據講新店嘅訂位，足足成個星期滿晒。呢間叫做性感居酒屋嘅食肆，點解咁好生意，據講佢哋班廚師，個個來頭都唔簡單，除咗煮出一般居酒屋有嘅料理之外，連歐陸美食都會做，而且用料一半以上由飛機新鮮運到，所以整出嚟嘅味道，拍得住星級食肆。價錢唔算貴，食一個最平嘅套餐只需兩千九百九十九日圓，為起嚟三百蚊港紙左右，菜式竟多達十一款，真係好抵食，但嚟嘅朋友其實都係醉翁之意不在酒。
事關佢哋嘅女侍應，全部都以性感比堅尼示人，客人眼睛食冰淇淋都食飽，而且女侍應個個都年輕貌美，着上三點式，更係秀色可餐，佢哋除咗招待客人之外，每晚仲會有三四次才藝表演，讓客人一邊食嘢，一邊睇節目，真係賞心悅目，而且佢哋仲會周不時嚟同客人斟酒，大家啱傾嘅仲可以傾兩句，就算請佢哋飲酒都冇問題，但切忌手多多，如果觸犯法例，店內會有人員教你禮貌。如果想約囡囡出街就要私下面議，據講有一半囡囡都有得傾嘅，係咪好想去捧吓場呢？
撰文：小德