一個囡囡由入行，到升上阿姐級或者所謂主任級，最快都要半年至九個月，但東莞由於嚴重缺乏囡囡，所以好多新人做咗一個月唔夠就升到阿姐級，佢哋經驗完全唔夠，要佢哋負責埋管理工作，往往會一團糟，認真唔掂。
臨近農曆新年，好多骨場嘅阿姐級囡囡，都會因為辛苦咗一年，搵夠錢，就打算返鄉下過年，如果間骨場過年期間唔休息嘅話，佢哋就會冇晒有經驗嘅囡囡，唯一嘅辦法，就係升一啲新人或者冇乜經驗嘅囡囡做一姐嚟填補空缺。囡囡一舊飯咁就可以坐上阿姐嘅位置，真係有啲濫竽充數嘅味道，客人唔知，以為囡囡收得咁貴，一定經驗豐富，戰鬥力強，點知最後服務欠佳，至知道自己中招，你哋話幾唔負責任呢。除咗前線囡囡求其搵人頂上，原來好多骨場嘅管理人員都係一樣。
佢哋可能由囡囡或者侍應臨時拉伕上陣，負責安排囡囡上班或調動房間等工作，由於冇經驗，所以周不時有客冇女返工，或者有女冇客幫襯，特別係客人人山人海咁嚟捧場嘅時候經常出錯，要佢安排囡囡，就冇囡囡，安排房間，就冇房間，差唔多每年春節，上到骨場都會遇到，有時唔係骨場冇女冇房，而係負責管理嗰個經驗不足，倒瀉籮蟹，顧得囡囡就顧唔到房，顧得房嚟又顧唔到囡囡，所以客人只有無止境地喺度呆等，所以奉勸骨場冇人就休息好過，亂咁嚟始終唔係辦法。
撰文:小德